احنا اتخلقنا مسلمين
اياك نعبد خاشعين
نطلب رضاك ومفيش سواك
وبنور جلالك نستعين
النار بتاكل نفسها
من غلها ومن يأسها
والروح يا رب بقدرتك
مفيش شيطان هيمسها
يا رب ذنوبى بخفيها
مراية الروح تبان فيها
تفور مالعين سبع براكين
ف بير زمزم بطفيها
(حسيتها أوى كإنها بتتكلم عنى)
شجرة قلبى تملى بصونها
ودموع روحى على أغصانها
لما تغيب الشمس عليها
نور سبحانه بيطمنها
يا إلهى الرحيم الأمان الأمان
مالشيطان الخفى والشيطان اللى بان
من عيون العدو ومن عيون الصديق
من سؤال اللئيم والخسيس والجبان
عليه العوض منه العوض
مقبلش من غيره العوض
يا رب راضى بقسمتى
بالفقر والجوع والمرض
(رسخت فيا معنى مش عارفه ازاى كان غايب عنى)
بخاف مالضحكه والتكشيره
واللى ف قلبه يدارى الغيره
ماللى بيضحك وبيحسدنى
وعين القلب يا رب بصيره
أمك وأبوك علطول حبوك
ليه إنت بقيت غصن من الشوك
ادعى لربك يغفر ذنبك
وافتح قلبك لما يعاتبوك
بناديلهم وبسمعهم
وبدعيلهم تشبعهم
ماتحوجهم لحد يا رب
ولا لمخلوق تجوعهم
يا رب سلم منهم
من غلهم وجهلهم
وازرع ف قلبى المغفره
لما يزيدو ف ظلمهم
(يااااااااااااااا رب سلم)
بضحى بروحى مش نادم
وأحس بإنى بنى اّدم
يا رب أنا نفسى اعيش فرحان
وأموت مظلوم ومش ظالم
ر ب الحياه والموت
بخاف انام لأموت
ببكى ف أحلامى
من غير دموع ولا صوت
يابن اّدم اختيار
عدلك وظلمك اختيار
ف مشيئة الله الرضا
جهلك وعلمك اختيار
يا رب يا حى يا قيوم
حمام الروح على المدنا
يصلى يصوم ولما يقوم
بينداه ليه على ولادنا
ف رياض الحسن الربانى
أنا بره زمانى ومكانى
أشجار بتسبح لخالقها
وزهور بتطير من بستانى
يا رب العالمين
ف بحر الطيبين
النيه صافيه جدا
والناس قريبين
نحل الخيال بيطن
ابليس يزوم ويزن
ارحمنى يا ربى
قلبى الضعيف بيإن
(يا رب قوينا)
يا رب انا مكسوف
بزرع ف قلبى الخوف
مبقولش كلمة حق لو
شفت سيف مقصوف
يا رزاق يا كريم يا عظيم
بمشيئتك الشمس نسيم
وبنشبع من لقمه حلال
وبحمدك بنعيش ف نعيم
الموت فرح يوم الحساب
وياريت دعائى مستجاب
اوعدنى يا رب بلقاك
خلصنى من طبع الغراب
قلت لنبينا المصطفى
هو السلام ليه اختفى
صرخ اليمام ف الغار وقال
عشان مفيش لحظة صفا
(لحظة صفا)
يا رب الروح انا طيب
مع الشرير مع الطيب
ملاذ ليهم وأم وأب
ولو بعدو أنا قريب
مش خوف والحساب
ولا عشان اّخد ثواب
بلجأ إليك من غير غرض
وف حب ربى مفيش عذاب
(مفيش عذاب)
الوصال الوصال يا حميد الخصال
روحى تسأل بلال والقمر والهلال
إمتى أصلى وأقوم ف مقام الرسول
لو ينول القبول أسقى روحى الحنان
الدنيا حلم بتحلموه
هتندموا لو تفهموه
استغفروا ربى العظيم
واتعلموا إزاى تحمدوه
ربى العليم البصير
انا نفسى اموت ع السرير
وأنول رضاك ف اخرتى
من غير مرض وهموم كتير
أنا اتفطمت من الذنوب
وشبعت من قوت القلوب
ومن حلاوة الرضا
مالفرحه لما قدرت أتوب
(الله علييييك)
ورق الشجر صقفلهم
شمس وقمر على حجرهم
اللى رضيت عنهم يا رب
بتمنى أعيش فى ضلهم
سر الغيب ف حجاب مستور
وأنا يا طبيب دايما مغرور
بدعى يا ربى تنور قلبى
وتطفى النار يا شكور بالنور
الخوف مرض والوهم خوف
ومن الندم إزاى هشوف
ربى البصير ايه المصير
والشمس غابت مالكسوف
ربنا يقوى إيمانك ويكرمك يا استاذ
